బాలభాను విద్యాలయమునకు 1977 సంవత్సరము నుండి డా. కె. పార్వతీకుమార్ గారు మార్గదర్శియై ఉన్నారు. శ్రీమతి పార్వతీ వారణాసి గారు 1984 నందు విద్యాలయ ప్రధానోపాధ్యాయురాలిగా బాధ్యతలు స్వీకరించి కడుంగడు దీక్షతో పనిచేస్తున్నారు. ప్రస్తుతము ఆవిడ విద్యాలయ కార్యవర్గ సమితి లో ఉన్నారు. విద్యాలయ ప్రారంభము నుండీ ఉపాధ్యాయురాలిగా పనిచేయుచున్న శ్రీమతి శుభశ్రీ గారు, 2015 నుంచి ప్రధానోపాధ్యాయురాలిగా బాధ్యతలు స్వీకరించారు. ఆమెకు, విద్యాలయము మరియు సమాజ సేవలో ప్రత్యేక శ్రద్ధతో పనిచేసెడి అనుభవజ్ఞులు, అర్హులు, B.Ed పట్టభద్రులు ఐన శిక్షకుల అద్భుత సహాయ సహకారములున్నవి.

డా. ఎక్కిరాల కృష్ణమాచార్య గారిచే 1977వ సంవత్సరమున, ఒకరి ఇంటి మీద వేసిన పూరిపాక లో, పది మంది విద్యార్థులతో ఈ బాలభాను విద్యాలయము ప్రారంభింపబడినది. అప్పట్లో గృహిణులు, పిల్లల తండ్రులు ఇందులో శిక్షకులుగా పనిచేసెడివారు. పసి పిల్లల లేత వయసునుండే సనాతన ధర్మము యొక్క మూలసూత్రములను బోధించవలెనని ఆ మహానుభావుడి యోచన, ఆశ. ఆనాటి నుంచీ ఈనాటి వరకూ విద్యాలయపు ముఖ్యోద్దేశ్యము అదే. మెల్లగా విద్యార్థుల సంఖ్య పెరిగి 1996వ సంవత్సరమున, మురళీనగర్, విశాఖపట్నమున, పచ్చని ప్రకృతి ఒడిలో, విద్యాలయము కొరకు ఒక అందమైన భవన నిర్మాణము జరిగినది. ఇప్పుడు విద్యాలయపు విద్యార్థుల సంఖ్య 400.

తెలుగు రాష్ట్రాలలోని శ్రీకాకుళం, మచిలీపట్టణం, కోడూరు, కడప లలో కూడా బాలభాను విద్యాలయములు నిర్వహించబడుతున్నవి.

బాలభాను విద్యాలయములో విద్యార్థులు సమాజ దోపిడీదారులుగా కాక, సమాజ సేవకులుగా తీర్చిదిద్దబడుదురు. విద్యార్థులు బాధ్యత గల యువకులుగా, దిశా నిర్దేశకులై, సమాజానికి నిర్మాణాత్మకమైన సహాయ సహకారాలు అందించేవారుగా పరివర్తన చెందబడుదురు.

“బాలభాను” అనగా “బాల (ఉదయ) సూర్యుడు” అని అర్థం. అనగా, పిల్లలందరూ సూర్య భగవానుడి వలె నలుదెసలా విజ్ఞానపు వెలుగులు విరజిమ్మవలెనని ఆశించడమైనది.