1977 సంవత్సరము నవంబరు 22 న నావాణి ఆరవ జన్మదిన సభలో డా. ఎక్కిరాల కృష్ణమాచార్య గారు పలికిన సజీవ వాక్యాలు:

“ 'ఓం' అనే ఈవాణి (నావాణి) సృష్ట్యాదిగా మానవులకు అనుగ్రహింపబడినది. అదే 'నావాణి'. కేవలం ఇ.కె. ఉంటేనే నావాణి ఆదరించబడడం అనునది స్థిర ప్రయోజనం లేని పని. నేను దిగి వచ్చాను. 'నేను' మీ అందరిలోకి దిగి రావాలి. జ్యోతి, జ్యోతిచేత వెలిగించబడినట్లు, వెలుగుతున్న ఒక జ్యోతితో మీలోని జ్యోతులను వెలిగించుకోవాలి. మంత్రాలు, జీవితాలను నడపడం గాక జీవితమే ఒక తారక మంత్రం కావాలి. కలికాలంలో చీకటి కరుడు కట్టి ఉంది. ఎంత చిన్న దీపం వెలిగించుకున్నా మీ జీవితమనే గ్రంథాన్ని చదువుకోవచ్చు!”
(–మాస్టర్ ఇ.కె జీవిత చరిత్ర గ్రంథం నుండి)

నావాణి పత్రికలో జగద్గురు బోధలు మరియు పరమ గురువులచే ఇవ్వబడిన అనేక సాధనా రహస్యములు అందివ్వబడుచున్నవి. జ్యోతిషపరమైన విషయములు, హోమియో వైద్యవిధానమునకు చెందిన వివరములు, మరియు జగద్గురు పీఠము యొక్క ఇతర ప్రాంతములలో నిర్వహింపబడుతున్న అనేక కార్యక్రమములు తెలియపరచ బడుచున్నవి. రాబోవు మాసములో వచ్చు పర్వ దినముల వివరములు మొదలగునవి కూడా తెలుపబడుతున్నవి.

అంతరంగ పరిశుద్ధికి ఈ పత్రిక ఎంతో దోహద పడుతుంది. మానసిక సంక్షోభాన్ని తొలగిస్తుంది. మనశ్శాంతిని కలిగిస్తుంది. సమకాలీన పరిస్థితులతో సతమతమౌతున్నవారికి ఉపశమనాన్ని కలిగిస్తుంది. నిరాశ, నిస్పృహలతో కొట్టుమిట్టాడుతున వారికి ఉత్సాహాన్ని ఊపిరిగా నిలుపుతుంది. జీవన విధానాన్ని ప్రబోధిస్తూ వుంటుంది. పూర్వకర్మానుసారము బాధపడుతున్నవారికి, అలాగే కష్టనష్టాలలో కూరుకుపోయిన వారికి, అశాంతి, అనారోగ్యాదుల వేదన ఉన్నవారికి నావాణి ఆపద్భాంధవిగా సందర్శన మిస్తుంది. ఆదుకుంటుంది. ప్రత్యేకించి ఆత్మబంధువుగా ప్రతిమాసం దర్శనమిస్తుంది. దైవవాక్కు దూతగా దివ్య స్పర్శను కలిగిస్తుంది. పాఠకులను, సాధకులను కర్తవ్యోన్ముఖులను చేయటంలో ఈ పత్రిక ముందుంటుంది. వెనుక నుండి జిజ్ఞాసువులను జ్ఞాన సాధకులుగా నడిపిస్తూ వుంటుంది. పరమగురువుని సంకల్పమే ఈ పత్రికకు పునాది. ఇది సత్యం కనుక శాశ్వతం. ఆత్మజ్ఞానం, ధర్మజీవనం, సత్య దర్శనం, దైవానుభూతి ఇత్యాదులను కల్పించడానికి “నావాణి” మార్గదర్శకంగా ఉంటుంది. నిరంతర స్ఫూర్తిని, నిత్య తృప్తిని కల్పించడమే ఈ పత్రిక విశిష్టత.
(– నావాణి 41 వ జన్మదిన సంచిక నుండి)