ఈ యోగములోనికి ప్రవేశించిన తరువాత దీనికి మొదటి ప్రాధాన్యత ఇవ్వవలెనని తెలియవలెను. మన జీవితము నందు అన్నివిషయముల కంటే ఈ యోగమే ప్రాధాన్యమై యుండవలెను. ఈ విధమైన దృక్పధము మన యందు యోగము త్వరగా పూర్తి అగుటకు అవకాశము కలిగించును.

ఈ యోగము చేయు సమయమున, మనము సహజమైన సాధారణ జీవితము గడుపుచు ఇతరములను వేటినీ అశ్రద్ధ చేయరాదు. కనుక ఈ యోగము పై అతి విశ్లేషణ చేయరాదు. యోగమనగా మనము సహజముగా ఉండుటయే. సహజత్వము సమన్వయమునకు దారితీయును

ఈ యోగము శరీరమునకు సంబంధించిన ఆసనములకు చెందినది కాదు; ఇది శరీరము కన్నా ఎక్కువ మనసుతో పనిచేయును. భౌతిక ఆసనముకన్నా, మానసిక స్ధిరత్వము అత్యంత ముఖ్యము.

అయినప్పటికీ, సూక్ష్మ మరియు కారణ శరీరములు వృద్ధిపొందుటకు భౌతిక శరీరమే ఆధారము. కనుక మనము భౌతిక శరీరమును అశ్రద్ధ చేయక, చక్కని ఆరోగ్యమును దృఢత్వమును కాపాడుకొన వలెను. ఆరోగ్యము సరిగా లేనిచో యోగాభ్యాసమును కొనసాగించలేము. కనుక కనీస ఆరోగ్యమును కలిగియుండుట మన బాధ్యత.

మనము ఆహారము, పని, భాషణము, విశ్రాంతి, విహారం మరియు నిద్రల యందు మితము వహించాలి. అన్ని సమయముల యందు మనము ఆరోగ్యముగా ఉండుటకు అనువైన దినచర్యను కలిగి యుండవలెను. మన శరీరము, కార్యకలాపములు మరియు నిద్ర ఏవీ కూడా మన యోగాభ్యాసమునకు అడ్డుకాకూడదు.

మనము నిద్రించునపుడు మన మనస్సు, స్వభావము మరమ్మత్తు చేయబడును. కనుక ఈ యొగాభ్యసము చేయు సాధకులకు నిద్ర ఎంతో ముఖ్యమైనది. మనము నిద్రకుపక్రమించినపుడు, ప్రార్థన చేసి, మనయందు కావలసిన మార్పులకొరకు మనము మాస్టారుగారి సాన్నిధ్యమునకు వెళ్లుచున్నాము అని తెలిసియుండవలెను. “నీవు నిద్రించునపుడు, నీ సూక్ష్మ శరీరమును, భౌతిక శరీరము నుండి వేరుచేసి నీ యందు కావలసిన జ్ఞానమును అందించు” నని మాస్టారు గారు చెప్పి యున్నారు.

చంచలమైన ఆవేశపూరిత మనస్తత్వము గలవారికి ఈ యోగము సరియైనది కాదు. ఉదారమైన సేవకు అంకితమై భావావేశములను తొలగించుకొనవలెను.

కనీసపు ఆర్ధిక స్థిరత్వము లేకుండా మనము ఈ యోగము నందు ప్రవేశించరాదు. మనము ఆర్ధికంగా ఇతరులపై ఆధారపడి యుండరాదు. ఆర్థికంగా, మన ప్రాథమిక అవసరాలను తీర్చగల కార్యాచరణను కలిగియుండవలెను. అలా కానిచో, మొదట దాని కోసం పని చేయాలి. లేకపోతే, మనసుకు స్థిరత్వం లేక సాధన యందు ఊగిసలాడుతుంది.

ఈ యోగము మనకు భౌతికంగా, ఆర్థికంగా, ఇంటా, బయటా కూడా అన్నివిధములుగా స్థిరత్వము పొందుటకు సహాయపడును, ఎందుకంటే యోగమునకు అన్నీ ముఖ్యమే. మాస్టర్ సివివి గారి యోగ మార్గములో కనీస సరదాలు కూడా నిషేదించబడలేదు. వివాహము చేసుకోకుండా, కుటుంబము లేకుండా, ఉద్యోగం చేయకుండా - మరి ఎట్లా జీవించాలి అని అలోచించ నవసరము లేదు.

సంఘ వ్యతిరేక అంశాలను కలిగి ఉన్న వ్యాపారం లేదా ఉద్యోగం ఏదైనా అటువంటి దానిని మనం చేయరాదు మరియు అలాంటి కార్యకలాపాలకు మనము మద్దతు ఇవ్వకూడదు లేదా ప్రోత్సహించకూడదు. సంఘ వ్యతిరేకమైన కార్యక్రమముల వలన మనయందు భయము పెరిగి మరుగున దాక్కొనవలసి వచ్చును. భయం ఉన్నచోట, యోగాభ్యాసం నిరోధించబడుతుంది.

మనం సమయం, శక్తి మరియు డబ్బును అవసరానుగుణంగా ఖర్చు చేయాలి. అదే సమయంలో, మన వైఖరిలో కఠినంగాకాని లేక మొండిగాకాని ఉండక, సరళంగా వీలుకలిగి యుండవలెను.

మనం ఇతరుల వ్యవహారాల పట్ల ఆసక్తిగా ఉండకూడదు లేదా ఇతరుల గురించి అభిప్రాయాలు కలిగి ఉండకూడదు. ఇతరులు వారి జీవితాల గురించి మాట్లాడేటప్పుడు, మనం శ్రద్ధగా వినాలి, ఉదాసీనంగా ఉండకూడదు. మన బృందములో లేదా మన కుటుంబంలోని ప్రతి దాని గురించి మనకు తెలియజేయాలని అనుకోకూడదు. మనం తెలుసుకోవలసిన దాని గురించి ప్రకృతి తెలియజేస్తుంది